Istorya kan Olas

Ang barrio kan Olas saru sa mga tinatangraw na lugar kan pagtaraed na barangay sa Lagonoy North.Ini kaya an saru sa mga naging sentro kan kalakalan kan Nipa asin Samhod.Dakul igdeng magugunong produkto na talagang naiiba sa sa pagtaraed na barrio arug na sana kan “punaw” na sa baybayon sana kan Olas makukua.Kan mga panahong nagpupuon-puon pa sana an barriong ini may pitong harung na igdeng nakatugdok na pinapamayuhan kan mga residenteng sinda Braulio Jugar, Jacobo Obiña, Tinong Remodo, Amado Gavelo, asin an pamilya kan Viñaflor asin Valenzuela.1950 kan pormal na inapod an satuyang baryo na Olas nin huli sa mga nagkukurupot-kupot daang Nawi na iyo man an pinaggikanan kan  tumagiktik o mas bistado sa apod na Olas.Alagad baku kuta ini an orihinal na pangaran kan barrio.Antipolo an apod kan mga panahon nin huli ta sinusog an ngaran sa patrona kan babaeng parasakay na si Nuestra Señora de la Paz y Buen Viaje de Antipolo.Sa pag agi kan panahon sinubok man an kusog kan barrio asin naglaban an pamilyang Motil asin Bocaya sa dating barrio na ngunian iyo na an baybayon kan Olas huli siguro an sa maluyang pagkapot kan satung mga naging lideres.Kung satuyang paghuhurop-huropon haloy na palan an Olas nin huli ta dakul na an mga naging lideres igde na mas bistado sa apod na tinyente del barrio.Base sa samuyang ginibong paghahapot-hapot sa mga natatadang gurang kan barrio tigsasabing si Braulio Jugar asin Faustino Gavelo an mga enot na nagkapot kan barangay taong 1955-1959.Nagpuon an pormal na pamamalakaw  kan bag-ong sistema kan pulitika  sa barriong ini taong 1970 sa pangengenot ni Amado Gavelo asin si Jacobo Obiña man an naging punong barangay taong 1971-1972.Sinunudan pa ini kan anom na  naging kapitan iyo sinda Tinong Remodo(1973) Mariano Boy (1974) Leoterio Multo(naging 1^st kagawad  asin prinoklamar bilang kapitan taong 1976.)Dulfo Verdad (1977-1978). Sa taong 1979-1991 nabakante an posisyon nin huli ta mayong nagkusog boot na lumaog sa poder kan pagkakapitan.1992 kan kaputan an barrio ni Tommy Remodo  asin si Ernesto Gavelo man taong 1993-2006.Taong 2007 kan pruklamaron si Manuel V. Obiña bilang punong barangay hanggang sa presenteng taon. Iyan an ginikanan kan barrio kan Olas, mayaman sa istorya asin kultura talagang naiiba sa gabos na barangay igde sa Lagonoy.

Pinaghalian: 

 -Felismena V. Obiña                 
 - Asuncion Gayon

Pinaghalian kan Litrato: 
  -Regina Padilla 
  -Cecil Gavelo

Gibo ni:
Mike Angelo A. Obiña